Bydd Cronfa Mynediad i Swyddi Etholedig Cymru yn agor ar 15 Chwefror 2021 ar gyfer ymgeiswyr anabl yn sefyll yn Etholiad Senedd Cymru 2021.
Rheolir y Gronfa gan Anabledd Cymru gyda chyllid gan Lywodraeth Cymru. Mae’n cynnig cymorth ariannol i bobl anabl sy’n sefyll fel ymgeiswyr yn Etholiad Senedd Cymru 2021 ac etholiadau Llywodraeth Leol 2022.
Bydd yn talu am gymorth ymarferol er galluogi pobl anabl i fod yn rhan lawn o’r broses wleidyddol. Bydd yn cynnwys addasiadau rhesymol er galluogi pobl anabl i gystadlu ar amodau yn erbyn ymgeiswyr nid-anabl, ond nid costau ymgyrchu cyffredinol.
Dywedodd Rhian Davies, prif weithredydd Anabledd Cymru:
“Mae lansio Cronfa Mynediad i Swyddi Etholedig Cymru yn garreg filltir bwysig ym maes cydraddoldeb anabledd yng Nghymru wrth ehangu hawliau i fod yn rhan o’r broses ddemocrataidd a sicrhau bod y rhai a etholir i gynrychioli ein cymunedau yn adlewyrchu amrywiaeth y bobl yn y cymunedau hynny.
Wrth reoli’r cynllun peilot, mae Anabledd Cymru yn edrych ymlaen at gydweithio â phobl anabl fydd yn sefyll yn etholiadau’r Senedd a llywodraeth leol, ynghyd â phleidiau gwleidyddol o bob math a rhanddeiliaid sy’n rhan o’r broses etholiadol. Bydd y Gronfa yn helpu ymgeiswyr gyda phethau fel costau cyfieithwyr iaith arwyddo Prydain, cymorth gyda thrafnidiaeth a darparu offer er galluogi pobl anabl i gystadlu ar amodau teg yn erbyn ymgeiswyr nid-anabl mewn etholiadau cenedlaethol a lleol.”
Gwahoddir ymgeiswyr mewn etholiad y Senedd i gofnodi eu diddordeb cyn gynted â phosibl ac yn sicr cyn 5 Mawrth. Bydd angen cael ceisiadau prydlon er sicrhau trefnu cymorth mewn da bryd, ond gellir ystyried ceisiadau hwyr.
Cyflwynir fersiwn anhysbys o’r ceisiadau i’r Panel Gwobrau, sy’n cynnwys aelodau gyda phrofiad o fyw gydag anabledd a gwneud addasiadau rhesymol.
Mae manylion pellach ar gael ar dudalen y gronfa.
Dylai ymgeiswyr sydd am fynegi diddordeb yn y Gronfa gysylltu ag Anabledd Cymru ar info@disabilitywales.org neu ffôn 029 2088 7325.
Seiliwyd y manylion ar y wefan ar y dyddiad pleidleisio presennol 6 Mai. Os bydd unrhyw newid, byddwn yn cyhoeddi amserlen newydd.
Golygyddion:
Manylion pellach a chyfweliadau:
- Rhian Davies, prif weithredydd 029 2088 7325 / rhian.davies@disabilitywales.org
- Miranda Evans, rheolwraig polisi a rhaglenni 029 2088 7325 / miranda.evans@disabilitywales.org
- Philip Westcott, swyddog cyfranogiad dinesig 029 2088 7325 / philip.westcott@disabilitywales.org
